Pages

Friday, September 14, 2012

အစိုးရတပ်ဖွဲ့များ မှားယွင်းစွာ ပစ်ခတ်မှုကြောင့် ကချင်ပြည်နယ်၊ ဖားကန့်မြို့တွင် ဒုက္ခသည် တဦး သေဆုံး၊ ခြောက်ဦး ဒဏ်ရာရ

အစိုးရတပ်ဖွဲ့များမှားယွင်းစွာပစ်ခတ်မှုကြောင့်ကချင်ပြည်နယ်၊ဖားကန့်မြို့တွင်းမှော်ဝမ်း ရပ်ကွက်မှ နှစ်ခြင်း
အသင်းတော်ဘုရားကျောင်းတွင်ခိုလှုံနေသောစစ်ပြေးဒုက္ခသည်တဦးသေဆုံးကာခုနှစ်ဦးဒဏ်ရာ ရရှိသွား
ကြောင်း ဒေသခံများက ပြောသည်။
ကြာသပတေးနေ့ ညနေ ၃ နာရီခွဲချိန်မှ ၆ နာရီခန့်ထိ နှစ်နာရီခန့်ကြာ ပစ်ခတ်ခဲ့သဖြင့် ဆွတ်ငိုင်ယန်ကျေးရွာ
မှ အသက် ၁၄ နှစ်အရွယ် နဝမတန်း ကျောင်းသူ မရှရမ် ဆိုင်းဂျာအိမ်၏ ပေါင်ရင်းနှင့် နောက်ကျောတွင်
ကျည်ဆံ ထိမှန်၍ ဖားကန့်မြို့ ဆေးရုံတွင် ခွဲစိပ်ကုသမှု ခံယူနေစဉ် ကွယ်လွန်သွားသည်ဟု မှော်ဝမ်းနှစ်ခြင်း
အသင်းတော်မှ ဆရာမ နန်ဆန် က ပြောသည်။

“အစိုးရဘက်က ဆွပ်ငိုင်ယန်ရွာမှာ အရက် မူးအောင် သောက်ပြီးတော့ ဆွပ်ငိုင်ယန် အောက်ဘက် အဆင်း
မှာ ဗုံးတလုံး ပေါက်ကွဲသံကြားလို့ သေနတ်တွေ ရမ်းသမ်းပစ်၊ ဗုံးတွေ ကျဲလိုက်လို့ ကျမတို့ ဒေသခံတွေဆီ ထိ
သွားတာ သူတို့ အစိုးရ ပစ်လိုက်တဲ့ ကျည်ဆံ ထိမှန်သွားတယ်။ ညက ဆေးရုံမှာ ခွဲစိတ်လိုက်တော့ ကျည်ဆံ
က ဝမ်းပိုက်ဘက်ပေါက်သွားလို့ ကလီစာတွေ အကုန်လုံး ပျက်စီးသွားလို့ သေဆုံးသွားတယ်” ဟု ဆရာမက မဇ္စျိမကို ပြောသည်။

ထို့ပြင် အသက် ၃ဝ နှစ်ကျော်အရွယ် ဦးယားကု၊ ဦးလဘူ ဆိုင်းခွမ်၊ သမီးဖြစ်သူ မလဘူ လုအောင်၊ မဆိုင်းပန်
နှင့် ဖက်သီး ဆိုသူတို့ အပါအဝင် ခြောက်ဦးလည်း ဗုံးဆံများ ထိမှန်၍ ဒဏ်ရာများ ရရှိခဲ့သည်ဟု သူက ဆက်
ပြောသည်။

ဆွပ်ငိုင်ယန်ကျေးရွာ အခြေစိုက်ထားသည်မှာ တပ်ရင်း ခလရ ၅၂ တပ်ဖွဲ့များ ဖြစ်ပြီး နမခ လက်အောက်ခံ တပ်ရင်း များလည်း ရှိသဖြင့် ပူးပေါင်း တပ်များအချင်းချင်း မှားယွင်းပစ်ခတ် တိုက်ခိုက်ကြခဲ့သည်ဟု ဒေသခံ
များက ထင်မြင် ယူဆနေကြသည်။

သြဂုတ်လ ၂၉ ရက်နေ့က ကချင်လွတ်လပ်ရေးအဖွဲ့ KIO တပ်ဖွဲ့များနှင့် အစိုးရအကြား တိုက်ပွဲဖြစ်ပွားပြီး
နောက်နှစ်ဖက်တပ်များ အသင့်အနေအထား စောင့်ဆိုင်းနေကြသဖြင့် ယခုကဲ့သို့ အစိုးရတပ်ဖွဲ့များက KIO ထင်မှတ်ကာ အချင်းချင်း ပစ်ခတ်ကြခြင်းသာ ဖြစ်ကြောင်း KIO တပ်ရင်း ၆ မှ ရှေ့တန်းတပ်ဖွဲ့မှူး ဗိုလ်ကြီး လဒွဲက ပြောသည်။

“ကျနော်တို့နဲ့ တိုက်ပွဲဖြစ်တာ မဟုတ်ပါဘူး။ သူတို့အချင်းချင်း ကျနော်တို့လာတယ်ထင်ပြီး လူမှားပြီး အဖွဲ့ သုံးဖွဲ့ အချင်ချင်းပစ်ခတ်ကြတာ။ ဒီမှော်ဝမ်းအထက် ဆွတ်ငိုင်ယန်ကျေးရွာမှာနေတဲ့ တပ်ဖွဲ့နဲ့ ဖားကန့်အ
မြောက်တပ်တွေ အချင်းချင်းမှား ပစ်ကြတာပါ။ အဲဒီမှာ မျောက်ဖြူဘက်မှာရှိနေတဲ့ တပ်ဖွဲ့တွေလည်း ပြန်ပစ်
ကြတယ်” ဟု မဇ္စျိမကိုပြောသည်။

မှော်ဝမ်း နှစ်ခြင်းဘုရားကျောင်းအတွင်း စစ်ပြေးဒုက္ခသည် ၇၆ဝ ဦးကျော် ခိုလှုံနေကြပြီး ၎င်းတို့မှာ သေနတ်
သံများပြန်လည် ထွက်ပေါ်လာမည်ကို စိုးရွံ့စွာ နေထိုင်နေရသည်ဟု ဆရာမ ဒေါ်နန်ဆန့်က ပြောသည်။

“ကျမတို့က ပြောတောင် မပြောတတ်တော့ဘူး။စိတ်နဲ့ကိုယ်တခြားစီ ဖြစ်နေပြီ။ ကျမတို့ ဘုရားကျောင်းဘက်
မှာမော်တာတွေ ပစ်၊ ဗုံးတွေပစ်နေကြလို့ ကျမတို့က ဘာသံမှ မကြားချင်တော့ဘူး။ မနေ့က ၄ နာရီလောက်
ကနေသေနတ်သံကြားတာ။ ခုထိ ကျမတုိ့ ထမင်းစားချင်စိတ်တောင် မရှိတော့ဘူး” ဟု ဆိုသည်။

ထိခိုက်ဒဏ်ရာရသူများနှင့်ပတ်သက်၍ ဆရာမ နန်ဆန်က “ဒီကျမတို့ မှော်ဝမ်း ဘုရားကျောင်းနဲ့ အစိုးရ မူ
လွန်ကျောင်းကြားမှာ ကျလာတဲ့ ဗုံးကြောင့် ဦးယားကုက ခြေဖနောက် နှစ်ဘက်စလုံး အကြောထိ သွားတယ်
။ နံရိုးမှာလည်း ထိသွားတယ်။ ဘယ်ဖက်ပခုံး ထိတယ်။ ဆိုင်းပန်က ဘယ်ဖက်ပေါင် အကုန်လုံး စုတ်ပြတ်သွား
တယ်။ လက်မှာလည်း ထိတယ်၊ နောက် ဦးလဘူ ဆိုင်းခွမ်နဲ့ မဂျာလုအောင်တို့ သားအဖ နှစ်ယောက်စလုံးက မျက်နှာမှာ ထိသွားတယ်၊ ဖက်ဆီး ဆိုတဲ့တယောက်က လက်မှာ ထိတယ်” ဟု ပြောသည်။

၎င်းတို့အထဲမှ အသက် ၃ဝ နှစ်ကျော်အရွယ် ဦးယာကုနှင့် ဒုတိယတန်း ကျောင်းသူ မလဘူဂျာလုအောင်တို့
 နှစ်ဦး သည် ဒဏ်ရာ ပြင်းထန်သဖြင့် မြစ်ကြီးနားမြို့ဆေးရုံသို့ သွားရောက်ကုသမည် ဖြစ်ကြောင်းသိရသည်။

စက်တင်ဘာလ ၇ ရက်နေ့ကလည်းမှော်ဝမ်းဘုရားကျောင်းတွင်ခိုလှုံနေသူ စစ်ပြေးဒုက္ခသည်တဦးဖြစ်သည့်
အသက် ၂၁ နှစ်အရွယ် ကိုစဂလအောင် လည်း မှော်မောင်းကုန်းသို့အသွားလမ်း တနေရာတွင် အစိုးရတပ်ဖွဲ့
များက ပစ်ခတ်၍သေဆုံးခဲ့ရသေးသည်။

မှော်ဝမ်း ရက်ကွက်လူကြီးများက သေဆုံးသွားသူ၏ အလောင်းကို ယူရန် ဖားကန့် ဗျူဟာမှူးထံ ခွင့်တောင်း
သော် လည်း ခွင့်မပြုသဖြင့် ယနေ့ထိ အလောင်းကို ယူနိုင်ခြင်း မရှိသေးကြောင်း ဖားကန့်မြို့ခံတဦးက ပြော
သည်။

အလားတူ အသက် ၂၇ နှစ်အရွယ် ဦးကရင်နော်ကျန်းကိုသည်လည်း ရေမဆေးရှာရန် သွားသည့် လမ်းတွင် ဗုံးဆံထိမှန်၍ သေဆုံးသွားခဲ့ရာ ယခုဆိုလျှင် ဖားကန့်မြို့နယ် KIO နှင့် အစိုးရတို့အကြား တင်းမာနေခြင်း
ကြောင့်ဒေသခံ အနည်းဆုံး သုံးဦး သေဆုံးသွားပြီ ဖြစ်သည်ဟု ဒေသခံများက ပြောဆိုကြသည်။

ကြာသပတေးနေ့တွင် ဆွပ်ငိုင်ယန်ကျေးရွာသားများအားခလရ ၅၂ တပ်ဖွဲ့များကဖားကန့်မြို့ စစ်ဗျူဟာကုန်း
သို့ခေါ်ဆောင်သွားကာ ပြန်လည် လွှတ်ပေးလိုက်သော်လည်း ရွှေ၊ ငွေများကို လုယက် သိမ်းယူမှုများ ရှိသည်
ဟု အခြား ဖားကန့်မြို့ခံ တဦးက ပြောသည်။

“အဲဒီကျေးရွာသားတွေကို အမျိုးသမီး၊ အမျိုးသား သတ်သတ်ထားပြီး ဗျူဟာကုန်းဘက်လည်း ခေါ်သွားတယ်
။  ဒါပေမယ့် ခုတော့ ပြန်လွှတ်လိုက်တယ်။ တချို့ သေတ္တာထဲက ပိုက်ဆံတွေ ယူ၊ မိန်းကလေးတဦးရဲ့ လက်
ထပ် လက်စွပ်လည်း လုယူသွားတယ်၊ အဲဒီလို သူခိုးဓါးမြလို့ လုပ်နေကြတယ်” ဟု သူက မဇ္စျိမကို ပြောသည်။

တိုက်ပွဲများကြောင့် အိုးအိမ်စွန့်ခွာ စစ်ပြေးဒုက္ခသည်ပေါင်း ၉,ဝဝဝ ကျော်သည် ဖားကန့်မြို့ပေါ်ရှိ ခရစ်ယာန် ဘုရားကျောင်းများ၊ ဗုဒ္ဓဘာသာ ဘုန်းကြီးကျောင်းများတွင် ခိုလှုံနေရပြီး ၎င်းတို့အတွက် မြို့နယ်အတွင်းမှ လူ
မှုအဖွဲ့အစည်းများသာ ကူညီထောက်ပံ့နေရကာ လုံခြုံရေး မရှိသဖြင့် အခြား အဖွဲ့အစည်းများ လာရောက် ကူ
ညီနိုင်ခြင်း မရှိသေးပေ။


ချင်းမိုင်(မဇ္စျိမ)

0 comments:

Post a Comment