မြိတ်မြို့နယ် လူမနေ ကျွန်းပေါ်က ထူးခြားသည့် ကျောက်ခေါင်းအုံး

RangonNewsDaily:: January . 3 .2014
တနင်္သာရီတိုင်း ဒေသကြီး မြိတ်ကျွန်းစု(ခေါ်) ကျွန်းစုမြို့နယ် အတွင်း ကမ္ဘာ့ ရေလမ်းကြောင်းနှင့် မီးစိမ်းကျွန်းအနီး၌ ရေချို၊ ရေငန် ဆက်စပ် လျက်ရှိပြီး လူသူတစ်ဦး တစ်ယောက်မျှ နေထိုင်ခြင်းမရှိသော ဒန်းကျွန်းပေါ်တွင်တံငါရေ လုပ်သားတစ်ဦး တွေ့ရှိခဲ့သော ထူးဆန်း သည့် ကျောက်ခေါင်းအုံး တစ်ခုအား မြိတ်မြို့ သိမ်တော်ကြီး စေတီ ဗုဒ္ဓယဉ် ကျေးမှု ပြတိုက်တွင် အများပြည်သူ ကြည့်ရှု လေ့ လာ နိုင်စေရန် ပြသ ထားကြောင်း သိရသည်။ အဆိုပါ ထူးဆန်းသော ကျောက်ခေါင်းအုံးအား တွေ့ရှိခဲ့သူ ကျွန်းစုမြို့နယ်နေ ရေလုပ်သား ကိုမောင်ဝင်းအား သိလိုသည်များ မေးမြန်း ခဲ့မှုအပေါ် ၎င်းက ''လွန်ခဲ့တဲ့ ၂ဝဝ၂ ခုနှစ် ၉လပိုင်း လောက်က ဒန်းကျွန်း လို့ခေါ်တဲ့ ကျွန်းတစ်ကျွန်းကို ရောက်ခဲ့ပါတယ်။
ဒီကျွန်းမှာက လူသူတစ် ဦးတစ်ယောက်မျှ မနေပါဘူး။ 

 

ဒီကျွန်းက ရေချို၊ ရေငန် စပ်တာဆိုတော့ ကျွန်တော်တို့ ငါးဖမ်း ရေလုပ်သားတွေ ရေချိုးရင်း အနားယူတာ မျိုးတွေ လုပ်ကြပါ တယ်။

အဲ့ဒီအချိန်မှာ ကျွန်တော် ရေချိုးဖို့ကျွန်း ပေါ်ကို တက်လာတဲ့ အခါ သောင်ပြင်မှာ သာမန် ခေါင်းအုံး တစ်လုံးနဲ့ အရွယ်အစားချင်း တူညီတဲ့ ကျောက်ခေါင်းအုံး တစ်ခုကို တွေ့ခဲ့ပါတယ်။
ကျွန်တော် လည်း လှေပေါ်မှာ ခေါင်းအုံး လုပ်ဖို့ ထမ်းယူ လာခဲ့ပါတယ်''ဟု ပြောကြားသည်။

ဆက်လက်၍ ''ကျွန်တော့်အိမ်ရောက်တော့ ဒီခေါင်းအုံးနဲ့ အိပ်လိုက်တဲ့အခါမှာ ညသန်းခေါင်ကျော် အချိန်ရောက်ပြီဆိုတာနဲ့ ခေါင်းထဲမှာ တဖျစ်ဖျစ်မြည် လာပြီးတဲ့ နောက် ဦးခေါင်းတွေ၊ ခြေဖျား၊ လက်ဖျားတွေ အထိ တဖျစ်ဖျစ် အသံတွေ မြည်သွားပါတယ်။

ကျွန်တော်လည်း အံ့အားသင့်သွားပြီး နောက်နေ့ နံနက်လင်းတဲ့ အချိန်မှာ တစ်ကိုယ်လုံး လန်းဆန်းပေါ့ပါးနေပြီး နေလို့ထိုင်လုိ့ အရမ်းကောင်းတဲ့ အနေအထားမျိုးတွေ ဖြစ်ပေါ်နေ တာကို တွေ့ရပါတယ်။

ကျွန်တော်လည်း အံ့သြ တကြီးနဲ့ ပဲ ဒီအတိုင်း နေခဲ့ပါတယ်။ ကျွန်တော်တို့ တံငါရေလုပ်သား တွေဟာ အသောက်အစား မကင်းပါဘူး။ တစ်ခါတစ်ရံ သူငယ်ချင်းတွေနဲ့ ဝိုင်းဖွဲ့ပြီး သောက် စားကြ တာမျိုးတွေလည်း ရှိပါတယ်။

အဲဒီလို အခါမျိုးမှာ အိမ်ပြန်ရောက်လို့ ကျောက်ခေါင်းအုံးပေါ်မှာ အိပ်လိုက်တယ် ဆိုရင်ပဲ ဦးခေါင်း တစ်ခုလုံးဟာ မီးနဲ့ မြှိုက်ထားသလို ပူလောင်လာပါတယ်။

ကျွန်တော်လည်း အရမ်းကို အံ့သြမိပြီး ဒီကျောက်တုံးဟာ သာမန်ရိုးရိုးတော့ မဟုတ်ဘူးလို့ သင်္ကာမကင်း

 ဖြစ်တာနဲ့ အရက်သောက်လာရင် မအိပ်ရဲ တော့ပါဘူး။

ဒါ့ကြောင့် ကျွန်တော့်ဆီ ရောက်ပြီး ရှစ်လခန့်အကြာမှာ မြိတ်မြို့ သိမ်တော်ကြီးဘုရားမှာ သွားရောက် လှူဒါန်းခဲ့တာပါ''ဟု ထူးခြားသည့် ကျောက် ခေါင်းအုံး အကြောင်းကို ပြောပြ၍ သိရသည်။ ။

မောင်မျိုး(ဧရာဝတီ)
မြ၀တီ , kolatt(PBDN)
RangonNewsDaily