OIC မှ မြန်မာအစိုးရထံ ဖြေရှင်းချက် တောင်းခံစာ တစ်စောင် ပေးပို့

အစ္စလာမ် ဘာသာဝင် နိုင်ငံပေါင်း ၅၇ နိုင်ငံဖြင့် ဖွဲ့စည်း ထားသော OIC (အစ္စလာမ် နိုင်ငံများ ပူးပေါင်း ဆောင်ရွက် ရေး အဖွဲ့) ၏ ယာယီ ဆက်ဆံရေး ရုံးဖွင့်လှစ်ရေး ကိစ္စကို မြန်မာ အစိုးရက တရားဝင် ငြင်းပယ် လိုက်သော် လည်း အကြောင်းကြားစာ တစ်စုံတစ်ရာ ပေးပို့ခြင်း မရှိ သဖြင့် ဖြေရှင်း ချက် တောင်းခံစာ တစ်စောင် ပေးပို့ ထားကြောင်း OIC  ပြန်ကြားရေးဌာန မှ မစ္စ မဟာရက်ခီး ၏ ပြောကြား ချက်ကို VOA သတင်းဌာန တွင် ဖော်ပြသည်။ OIC ကို ကန့်ကွက်သော အနေဖြင့် ဆန္ဒ ဖော်ထုတ်မှုများ တစ်နိုင်ငံလုံး အတိုင်း အတာထိ ဖြစ်ပေါ်ခဲ့ပြီး နောက် OIC ဆက်ဆံရေး ရုံး များ ဖွင့်လှစ်ရန် ကိစ္စမှာ ပြည်သူ့ ဆန္ဒနှင့် မကိုက်ညီ သဖြင့် ခွင့်ပြုမည် မဟုတ်ကြောင်း နိုင်ငံတော်သမ္မ္မတရုံး က အောက်တိုဘာလ ၁၆ရက် နေ့ မွန်းလွဲ ၃နာရီ ၃ဝမိနစ်ခန့် တွင် ထုတ်ပြန်ခဲ့ခြင်း ကို ၄င်းက ယခုကဲ့သို့ ပြောကြားခြင်း ဖြစ်သည်။

OIC ဆက်ဆံရေး ရုံးများကို ရန်ကုန်နှင့် စစ်တွေမြို့ တို့တွင် ရုံးခန်း ဖွင့်လှစ် ရန် မြန်မာ အစိုးရ နယ်စပ်ဝန်ကြီး နှင့် နားလည်မှု စာချွန်လွှာကို စက်တင်ဘာ လ အတွင်းက သဘောတူ လက်မှတ်ရေး ထိုးခဲ့ပြီး ဖြစ်၍ ယခုကဲ့သို့ ဖျက်သိမ်း လိုက်ခြင်း ကို မြန်မာအစိုးရ အနေဖြင့် တရားဝင် ဖြေရှင်း သင့်ကြောင်း မစ္စမဟာ ရက်ခီးကဆိုသည်။

အဆိုပါ ကိစ္စရပ်များ နှင့်ပတ်သတ်၍ နယ်စပ်ဒေသ နှင့် တိုင်းရင်းသား လူမျိုးများ ဖွံဖြိုးတိုးတက်ရေး ဦးစီးဌာန မှ ညွန်ကြားရေးမှူးချုပ် ဦးထွေးလှ အပါအဝင် တာဝန်ရှိသူ များကို The Voice Weekly က ဆက်သွယ် မေးမြန်း ခဲ့ရာ ဦးထွေးလှ မှာ အစည်းအဝေး တွင်း သို့ ရောက်ရှိ နေသဖြင့် ပြန်လည်ဖြေကြား နိုင်ခြင်း မရှိသေးကြောင်း ပြောကြားခဲ့ပြီး ကျန် တာဝန်ရှိသူ များမှာလည်း ၄င်းတို့နေဖြင့် ဖြေဆိုပိုင်ခွင့် မရှိကြောင်း ပြန်လည် ဖြေကြားခဲ့သည်။

OIC ဆက်ဆံရေး ရုံးစိုက်မည့် အရေးကို ကန့်ကွက် သည့် အနေဖြင့် ရန်ကုန်မြို့၊ မန္တလေးမြို့၊ ပခုက္ကူမြို့၊ မုံရွှာ၊ ဖျာပုံမြို့၊ စစ်တွေမြို့ အပါအဝင် မြန်မာ တစ်နိုင်ငံလုံး အတိုင်းအတာ ဆန္ဒ ဖော်ထုတ်မှု တစ်ရပ်ကို အောက်တိုဘာလ ၁၅ရက် နေ့တွင် ပြုလုပ် ခဲ့ကြပြီး သံဃာတော်များ ပြည်သူလူထုများ ပူးပေါင်း ပါဝင်ခဲ့ကြသည်။

The Voice Weekly