သိန်းလေးရာခန့်တန်သည့် ရတနာများခိုးသည်ဟု သမီးကို ဖခင်က အမှုဖွင့်

RangonNewsDaily:: Aug 29, 2013

ကျပ်သိန်းပေါင်းလေးရာခန့် တန်ဖိုးရှိသော ရတနာပစ္စည်းများ ခိုးယူသည်ဟုဆိုကာ အဘိုးအိုတစ်ဦးက သူ့သမီးကို အမှုဖွင့်တိုင်တန်းမှုတစ်ခု သြဂုတ် ၂၆ ရက်က ဖြစ်ပွားခဲ့ကြောင်း ရန်ကုန်တိုင်းရဲတပ်ဖွဲ့မှူး ရုံးက သတင်းထုတ်ပြန်သည်။ အမှုဖွင့် တိုင်တန်းသူသည် အသက် ၇၅ နှစ်အရွယ်ရှိ ဦးအောင်သိန်းဆိုသူဖြစ်ပြီး ရန်ကင်းစင်တာတွင် နေထိုင်ပြီး ရတနာများပျောက်ဆုံးသည့်နေ့က ၎င်းနှင့် ဇနီးသည်တို့ ဆရာကန်တော့ပွဲတစ်ခု၌ ကန်တော့ခံရန် သွားရောက် ခဲ့ကြောင်း ရဲမှတ်တမ်းတွင် တွေ့ရသည်။

ထိုဆရာကန်တော့ပွဲမှအပြန် ကုတင်အောက်တွင် ရှုံ့အိတ်ဖြင့်
ထည့်ပြီးထွေးခံဖြင့်အုပ်ကာ ၀ှက်ထားသော ကျပ်သိန်း ၃၈၀ ခန့်တန်သော လက်ဝတ်ရတနာပစ္စည်း ၂၁ မျိုးမှာ ပျောက်ဆုံးနေသည်ကို သိရှိခဲ့ရကြောင်း တရားလိုက ရဲကို တိုင်တန်းရာတွင် ထွက်ဆိုထားသည်။

ပိုင်ရှင်က ပစ္စည်းများ ပျောက်ဆုံးနေသည်နှင့် ပတ်သက်၍ သူ့ဖာသာစုံစမ်းခဲ့ရာ ဇူလိုင် ၂ ရက်မှ သြဂုတ် ၂ ရက်အထိ နေအိမ်တွင် ခေတ္တလာရောက်နေထိုင်ခဲ့သော သူတို့၏သမီးအရင်းဖြစ်သူ အသက် ၄၅ နှစ်အရွယ် ဒေါ်ခင်သန္တာသိန်းက လက်ဝတ်ရတနာများကို ခိုးယူသည်ဟု သံသရှိလာသဖြင့် ရဲကို ယခုလို တိုင်တန်းလိုက်ခြင်းဖြစ်သည်ဟု ရဲဌာနက ဆိုထားသည်။

ယခုအမှုကို ရန်ကင်းရဲစခန်းက အမှုအမှတ် (ပ)၁၈၅/၂၀၁၃ဖြင့် အမှုဖွင့်ထားပြီး စွပ်စွဲခံရသူကိုလည်း ရှာဖွေစုံစမ်း လျှက်ရှိရာ ၎င်းကိုတွေ့ရှိပါက ပြစ်မှုဆိုင်ရာ ဥပဒေပုဒ်မ ၃၈၁ ဖြင့် တရားစွဲဆိုမည်ဟု ရဲဌာန၏ ထုတ်ပြန်ချက်တွင် ဖော်ပြထားသည်။

ဇော်ဇော်ထွေး
မဇ္ဈိမ , RangonNewsDaily
kolatt (Pabedan): 29.8.2013