Pages

Friday, June 1, 2012

ဓါတ်ငွေ့ပိုက်လိုင်း စီမံကိန်းစတင်ပြီးနောက် ပြင်ဦးလွင်၊ နောင်ချို မြို့နယ်တွင် လယ်မြေ သိမ်းခံရမှုမြင့်တက်


မေလ ၃၁ ရက်၊ ၂၀၁၂ ခုနှစ်၊
ကျော်သူရမျိုး (YPI)

ကျောက်ဖြူ-ကူမင်း ဓါတ်ငွေ့ပိုက်လိုင်းစီမံကိန်း စတင်သည့်နောက် ပြင်ဦးလွင်နှင့် နောင်ချိုမြို့များတွင် လယ်မြေသိမ်းဆည်းခံရမှု မြင့်တက်လာခဲ့ပြီး ယခုအခါ ယင်းစီမံကိန်းနှင့် အခြားအကြောင်းအမျိုးမျိုးကြောင့် အသိမ်းခံရသည့် လယ်မြေ ဧက (၁၃၀၀၀) ကျော်အထိ ရှိလာကြောင်း တောင်သူလယ်သမားအရေး ဆောင်ရွက်ပေးသည့် စိမ်းလန်းပြင်ဦးလွင်အဖွဲ့မှ ပြောသည်။

“နှစ်လအတွင်း စုဆောင်းထားတဲ့ မှတ်တမ်းတွေအရ မြေဧက (၁၃၀၀၀)ကျော် အသိမ်းခံထားရပြီ၊ ဒါတောင်အသိမ်းခံထားရပြီး ဆက်သွယ်အကြောင်းကြားခြင်း မရှိသေးတဲ့ တောင်သူလယ်သမားတွေ ရှိသေးတယ် ” ဟုတောင်သူလယ်သမား ကွန်ရက်မှ ဦးစည်သူကပြောသည်။

 

ပြင်ဦးလွင်မြို့တွင် ဓါတ်ငွေ့ပိုက်လိုင်းသွယ်တန်းလျှက် ရှိသည့် အလုပ်ခွင်တခုကို ယခုလအတွင်း တွေ့ရသည့် မြင်ကွင်း၊ ၊ (သတင်းဓါတ်ပုံ ကျော်သူရမျိုး YPI )

လက်ရှိကာလတွင် လယ်ယာမြေအသိမ်းခံထားရသည့် ရွာပေါင်းမှာ (၆၄) ရွာထိ ရှိလာပြီး တရုတ်နိုင်ငံသို့ သွယ်တန်းဖောက်လုပ်လျှက်ရှိသည့် ဂတ်စ်ပိုက်လိုင်း စီမံကိန်း စတင်ချိန်တွင် လယ်ယာမြေသိမ်းခံရမှု ပိုမိုမြှင့်တက်လာသည်ဟု ၎င်းက ပြောသည်။

လယ်ယာမြေအသိမ်းခံရသည့် တောင်သူလယ်သမားအများစုသည် ၎င်းတို့ပိုင် လယ်ယာမြေများပေါ်တွင် နှစ်ပေါင်းများစွာ လုပ်ကိုင်ခဲ့ကြသော်လည်း လယ်ယာမြေနှင့် ပတ်သက်သော အသိပညာဖွံ့ဖြိုးမှု နည်းပါးသည့်အတွက် သီးစားခွန်၊ ပုံစံ(၁၀၅)နှင့် မြေယာမှတ်ပုံတင်ခြင်းများကို ပြုလုပ်ထားခြင်း မရှိသောကြောင့် လွယ်ကူစွာ အသိမ်းခံရခြင်းဖြစ်ကြောင်း စိမ်းလန်းပြင်ဦးလွင်အဖွဲ့ တောင်သူလယ်သမားကွန်ရက်မှ မှတ်ချက်ချ သည်။

လယ်ယာမြေများ အသိမ်းခံရမှုတွင် ကုမ္ပဏီများနှင့် အုပ်ချုပ်ရေးအာဏာပိုင်များမှ ပူးပေါင်းသိမ်းယူမှုများပြားပြီး တောင်သူလယ်သမားများ၏ လယ်ယာမြေများကို သိမ်းယူမည်ဆိုပါကရှေးဦးစွာ ကျေးရွာအုပ်ချုပ်ရေးမှူးရုံး မှခေါ်ယူပြီး နှစ်ပေါင်းများစွာ လုပ်ကိုင်လျှက်ရှိသော တောင်သူလယ်သမားများ၏ လယ်ယာမြေများကို ကုမ္ပဏီများမှ ပိုင်ဆိုင်ကြောင်း ပြောဆိုကာ အမြန်ဆုံး ဖယ်ရှားခိုင်းလျှက်ရှိသည်ဟုလည်း ကွန်ရက်မှပြောသည်။

“လယ်ယာမြေတွေသိမ်းမယ်ဆိုရင် ရပ်ကွက်ဥက္ကဋ္ဌကမင်းတို့လုပ်စားနေတာ ကုမ္ပဏီပိုင်မြေတွေဖယ်ပေးရမယ်။ မဖယ်ပေးရင် ပိုင်နက်ကျူးလွန်မှုနဲ့ အရေးယူမယ်ဆိုပြီး ခေါ်ပြောတယ် ”ဟု လယ်ယာမြေဧက(၆၀)ကျော် သိမ်းခံထားရသည့် ပြင်ဦးလွင်မြို့ အောင်ချမ်းသာကျေးရွာမှ ဦးအောင်နိုင်ကပြောသည်။

အဆိုပါကဲ့သို့ တောင်သူလယ်သမားများသည် လယ်ယာမြေများ အသိမ်းခံရခြင်းကြောင့် ၎င်းတို့၏ ဘ၀ရပ်တည်ရေးအတွက် လုပ်ကိုင်စားသောက်ရန် မြေယာများမရှိတော့ဘဲ ကျောက်တူးခြင်း၊ အုတ်ရိုက်ခြင်း စသည့် ကြုံရာကျပမ်းအလုပ်များကိုသာ လုပ်ကိုင်စားသောက်လျှက်ရှိကြောင်း မြေယာအသိမ်းခံရသည့် လယ်သမားများက ပြောသည်။

“တောင်သူတွေမှာ လယ်စိုက်ဖို့ ယာလုပ်ဖို့အတွက် ကိရိယာတွေ အစုံအလင်ရှိပေမယ့် လုပ်ကိုင်စားသောက်မှုအတွက် မြေနေရာမရှိတော့ဘူးဟု “စိမ်းလန်းပြင်ဦးလွင်အဖွဲ့မှ ဦးအောင်ကျော်ဆန်းကပြောသည်။

ယင်းကဲ့သို့ လယ်ယာမြေအသိမ်းခံရမှုများကို တောင်သူလယ်သမားများမှ လက်မှတ်ရေးထိုး၍ နိုင်ငံတော်သမ္မတအပါအ၀င် ဒေသအုပ်ချုပ်ရေးအာဏာပိုင်များထံ အသနားခံစာနှင့် တိုင်ကြားစာများ ပေးပို့ခဲ့ကြသည်။

“ကျေးရွာပေါင်း (၄၀)ကျော်က စာတင်လိုက်တဲ့အချိန်မှာ ဧက(၇၀၀) ကျော်ပြန်ရထားတယ်ဟု” တောင်သူလယ်သများကွန်ရက်မှ ဦးနေလင်းဦးကပြောသည်။

ယခုလို လယ်မြေအများအပြား သိမ်းဆည်းခံရမှုကှို ပြင်ဦးလွင်မြို့နယ် ပြည်သူ့လွှတ်တော်ကိုယ်စားလှယ် ဦးကျော်သီဟက “ သာမန်လုပ်ကိုင်စားသောက်ကြတဲ့ တောင်သူလယ်သများတွေဟာ အကြောက်တရားတွေနဲ့ နေခဲ့ရတယ်။ အဲဒီအကြောက်တရားတွေနဲ့ နေခဲ့ရတဲ့သူတွေဆီက ခြိမ်းခြောက်ပြီး ယူသွားမယ်ဆိုရင် ခံကြရတာပေါ့” ဟု မှတ်ချက်ချပြောဆိုသည်။

ို ယခုနှစ် မတ်လဆန်းတွင် ပြင်ဦးလွင်နှင့် နောင်ချိုမြို့နယ်အတွင်းရှိ လယ်ယာမြေအသိမ်းခံရသည့် တောင်သူလယ်သမားများမှ စုပေါင်း၍ စိမ်းလန်းပြင်ဦးလွင်ကွန်ရက်ကစတင်ဖွဲ့စည်းခဲ့ပြီး ပထမဆုံးအကြိမ် လယ်ယာမြေ အသိပညာပေး ဆွေးနွေးပွဲကို မေလ(၁၉)ရက်နေ့က ပြင်ဦးလွင်မြို့နယ်၊ အောင်ချမ်းသာကျေးရွာတွင် ပြုလုပ်ခဲ့သည်။

လွန်ခဲ့သည့် သီတင်းပတ်ကလည်း “သိမ်းဆည်းမြေယာ ပြန်ပေးပါ” ဆိုသည့် စာတမ်းပါ တီရှပ်များဖြင့် ၀တ်ပြုဆုတောင်းပွဲတရပ် ပြုလုပ်ရာ ယင်းဘုရားပရ၀ုဏ်ကို သော့ပိတ်ထားခဲ့သည့် အဖြစ်အပျက်လည်း ဖြစ်ပျက်ခဲ့သည်။        ။

 Yangon Press International 

0 comments:

Post a Comment