ရန်ကုန်မြို့ရေလျှံမှု အဆုံးသတ်ရန် ကြာမည့်အချိန်ကာလ အစိုးရကို မေးခွန်းထုတ်မည်

RangonNewsDaily:: June . 3 .2015

မိုးသည်းထန်စွာရွာသည်နှင့်တစ်ပြိုင်နက် ရေလျှံမှုများဖြစ်ပေါ်နေသည့် ရန်ကုန်မြို့တော်အတွင်း ရေကြီးရေလျှံမှုများ မဖြစ်ပေါ်စေရန် အစိုးရက မည်သို့လုပ်ဆောင်နေသည်ကို လာမည့် ရက်သတ္တပတ်အတွင်းပြုလုပ်မည့် တိုင်းလွှတ်တော်အစည်းအဝေးတွင် မေးမြန်းမည်ဟု ကြည့်မြင်တိုင်မြို့နယ်မှ ရန်ကုန်တိုင်းလွှတ်တော်အမတ် ဒေါ်ကြည်ကြည်မာက မဇ္ဈိမကို ပြောသည်။

"ဒါတွေကို ဒီနှစ်မိုးတွင်းအမှီမှာ ပြီးမလား။ နောက်တစ်ခုက ရေရှည်တည်တံ့ခိုင်မြဲဖို့ကို အားလုံးပူးပေါင်းဖို့ ဘယ်လို အစီမံတွေ ချထားလဲပေါ့။ လုပ်ငန်းတစ်ခုလုပ်တယ်ဆိုရင် ရေရှည်တည်တံ့ခိုင်မြဲဖို့က လိုအပ်တယ်လေ။ ဒါကြောင့် ဘယ်လိုစီမံဆောင်ရွက်ထားလဲဆိုတဲ့ မေးခွန်းပါ" ဟု ဒေါ်ကြည်ကြည်မာက ဇွန်လ ၃ရက်တွင် ပြောသည်။

ရန်ကုန်မြို့ရေကြီးရေလျှံမှုမဖြစ်ရန် တိုင်းအစိုးရအနေဖြင့် လက်ရှိဘဏ္ဍာနှစ်တွင် ဘတ်ဂျက်ငွေ ကျန်သိန်းပေါင်း သုံးသောင်းကျော်ရရှိထားပြီး ရေလျှံမှုမဖြစ်ရေးအတွက် အစိုးရက စနစ်တကျ အကောင်အထည်ဖော်ပေးရန်လို သလို ပြည်သူလူထုကလည်း ပူးပေါင်းလုပ်ဆောင်သင့်သည်ဟု သူက သုံးသပ်သည်။

"အစိုးရနဲ့ပြည်သူနဲ့ပူးပေါင်းမှ ရေရှည်အတွက်ကောင်းမှာလေ။ ဒါကြောင့် ဘယ်လိုအစီအမံတွေလုပ်မလဲဆိုတာတော့ သူတို့(အစိုးရ)ဘာပြောဦးမလဲ မသိဘူး။ ကိုယ့်မြို့ကြီး သာယာလှပဖို့၊ ရေကြီးရေလျှံတွေမဖြစ်ဖို့ဆိုတာက စည်းကမ်းလေးနဲ့ အမှိုက်ပစ်ဖို့ဘာညာကလည်း လိုတယ်လေ" ဟု ဒေါ်ကြည်ကြည်မာက ပြောသည်။

ရေကြီးရေလျှံမှုမှကာကွယ်ရန် မည်ကဲ့သို့လုပ်ဆောင်နေသည်ကို ရန်ကုန်မြို့တော် စည်ပင်သာယာရေးကော်မတီ၏ ဌာနအချို့ထံ မဇ္ဈိမက တယ်လီဖုန်းဖြင့် ဆက်သွယ်ခဲ့သော်လည်း ဆက်သွယ်မှု မရခဲ့ပေ။

စမ်းချောင်းမြို့နယ်မှ ရန်ကုန်တိုင်းလွှတ်တော်အမတ်တစ်ဦးဖြစ်သူ ဦးမျိုးမင်းအောင်ကမူ ရေကြီးရေလျှံမှုများ ဖြစ်ရခြင်းမှာ ရန်ကုန်မြို့ပြတွင် လူဦးရေထူထပ်လာခြင်း အပါအ၀င် စနစ်တကျမရှိသည့် ရေမြောင်းများကြောင့်ဟု ထောက်ပြသည်။

"အခုဟာက လူဦးရေကလည်း များလာတယ်လေ။ မြောင်းတွေကလည်း မရတော့ဘူးဗျ။ အရင်တုန်းက စမ်းချောင်းမှာ မြောင်းတွေက အနက်တစ်ပေပဲရှိတယ်လေ။ မြောင်းတွေက စနစ်မကျဘူး" ဟု တိုင်းရင်းသားစည်းလုံးညီညွတ်ရေးပါတီမှ အမတ်ဖြစ်သူ ဦးမျိုးမင်းအောင်က ပြောသည်။

၎င်း၏ မဲဆန္ဒနယ်ဖြစ်သော စမ်းချောင်းမြို့နယ်တွင်မူ ယခုနှစ်အတွင်း ရေမြောင်းများကို သုံးပေအနက် တူးပေးခဲ့သည့်အတွက် ရေလျှံမှုမရှိတော့ကြောင်း ဦးမျိုးမင်းအောင်က "ကျွန်တော့်မြို့နယ်ကတော့ အပြောအဆိုများလို့ထင်တယ်။ တော်တော်လေး လုပ်ပေးတယ်" ဟု ဆိုသည်။

ရန်ကုန်မြို့တွင် မိုးသည်းထန်စွာရွာသွန်းတိုင်း လမ်းများ၊ နေအိမ်များအတွင်း ရေကြီးရေလျှံမှုဖြစ်ပေါ်နေသည့် ဆိုးကျိုးကြောင့် ရန်ကုန်ပြည်သူများ အခက်တွေ့လျက်ရှိသည်။

Mizzima , KOLATT(PBDN)

RangonNewsDaily