ချင်းတွင်းမြစ် ရေတိုက်စား၍ ရေစကြိုတွင် အိမ်ခြေ ၄၀ ခန့် ထပ်မံပြောင်းရွှေ့

RangonNewsDaily:: September 22, 2013

မကွေးတိုင်းဒေသကြီး ရေစကြို မြို့နယ် ချင်းတွင်း မြစ်ကမ်းနံဘေးမှ ရှစ်အိမ်တန်း ကျေးရွာတွင် ချင်းတွင်းမြစ်ရေ တိုက်စားခံခဲ့ရမှုကြောင့် ယခုနှစ် ဇွန်လမှ စက်တင်ဘာလအထိ လူနေအိမ် ၄၀ ခန့် ထပ်မံရွှေ့ပြောင်း နေထိုင်နေရကြောင်း ယင်းကျေးရွာတွင် နေထိုင်သည့် ရွာခံများနှင့် ကျေးရွာအုပ်ချုပ်ရေးမှူးက ပြောကြားသည်။ မြစ်ရေ တိုက်စားခံခဲ့ရမှုကြောင့် အဆောက်အအုံ ဆောက်လုပ် နေထိုင်ခဲ့သည့် ရွာမြေများ၊ စိုက်ပျိုးမြေများ ဆုံးရှုံးခဲ့ကာ လက်ရှိအချိန်တွင် ကမ်းနှင့်ဝေးသည့် နေရာများတွင် ယာယီတဲများထိုး၍ နေထိုင်နေရပြီး ငွေကြေးတတ်နိုင်သည့် ရွာခံအချို့မှာ ကမ်းပါးနှင့်ဝေးသည့် လယ်မြေကွက်များတွင် တစ်နှစ်လျှင် ကျပ်နှစ်သောင်းမှ ငါးသောင်းအထိ ကုန်ကျခံကာ မြေငှားရမ်းပြီး အဆောက်အအုံများ ဆောက်လုပ် နေထိုင်နေသူများလည်း ရှိကြောင်း ရှစ်အိမ်တန်းကျေးရွာ အုပ်ချုပ်ရေးမှူးက ပြောကြား သည်။

“ကျွန်တော်တို့ တာဝန်ရှိသူတွေကို စာတင်တာလည်း အကြိမ်ပေါင်း မနည်းတော့ပါဘူး။ 

 

ရွာကို နေရာအတည်တကျ ဖြစ်စေချင်တယ်။ အခုအနေအထားက အဆောက်အအုံ ဆောက်လိုက်၊ ရေတိုက်စားလိုက် ဆိုတော့ အိမ်တွေလည်း အခိုင်အခံ့ ဆောက်မထားရဲဘူး။ ဖျက်ပြီး ပုံထားရတယ်။ ကိုယ့်အိမ်နဲ့ ကမ်းပြိုတာနဲ့ နီးလာလိုက်၊ ရွှေ့ပြောင်းလိုက် ဒီလိုပဲရွှေ့နေကြရတယ်။ နွားတွေကိုလည်း မြင်တဲ့အတိုင်းပဲ မိုးကာတဲ ထိုးပြီးထားရတယ်” ဟု ရွာခံတစ်ဦးက ပြောကြားသည်။

မြစ်ရေတိုက်စား၍ ကမ်းပါးပြိုကျသည့် ဖြစ်စဉ်များမှာ ယခုနှစ်အတွင်း ချင်းတွင်းမြစ်နှင့် ဧရာဝတီ မြစ်ကမ်းကျေးရွာ အများစုတွင် ဖြစ်ပွားလျက်ရှိပြီး ရှစ်အိမ်တန်း ကျေးရွာတွင်၂၀၁၂ခုနှစ် ဇွန်လက ကမ်းပြိုမှုကြောင့် အိမ်ခြေပေါင်း ၉၀ ကျော် ရွှေ့ပြောင်းခဲ့ရသည်။

The Voice Weekly , RangonNewsDaily
kolatt (Pabedan)