မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) အဖွဲ့ကနေ ခွဲထွက်ပြီး သီးခြားအဖွဲ့တွေ တည်ထောင် တဲ့ ရဲဘော်တချို့ကို ABSDF ဗဟို စစ်ကော်မရှင်က စက်တင်ဘာ ၅ ရက်နေ့နဲ့ ၇ ရက်နေ့မှာ ထုတ်ပယ်လိုက်ပြီ ဖြစ်ကြောင်း ကြေညာ လိုက်ပါတယ်။
ပြည်ထောင်စု ကာကွယ်ရေးတပ် (UNRA)နဲ့ ပြည်ထောင်စု ငြိမ်းချမ်းရေးနှင့် ဖွံ့ဖြိုးရေးအဖွဲ့ (UPDF) တပ်ဖွဲ့ အဖြစ် သီးခြား ဖွဲ့စည်းခဲ့ကြ တဲ့ ရဲဘော် ခင်ကျော်နဲ့ ရဲဘော် ကျော်ကျော် (ကချင်) တို့ကို ABSDF က ချမှတ်ထားတဲ့ မူတွေကိုကျော်လွန်ပြီး လုပ်ကိုင်ခဲ့ကြတဲ့ အတွက် ထုတ်ပယ်ခဲ့တာဖြစ်တယ်လို့ သိရပါတယ်။
ABSDF ဒုဥက္ကဋ္ဌ ဦးမျိုးဝင်း က“မီဒီယာတွေပေါ်မှာ ဖော်ပြနေသလို ABSDF က နှစ်ဖွဲ့ကွဲတာ မဟုတ်ပါဘူး။ ညီလာခံကနေ ရွေးချယ် တာဝန်ပေးထားတဲ့ ဗဟို ကော်မတီဝင် ၂၃ ဦးလုံးကလည်း ဒီကိစ္စမှာ ပါဝင်ပတ်သက်ခြင်းမရှိဘူး။ အခု ABSDF မှာရှိတဲ့ တပ်ရင်း တပ် ဖွဲ့တွေက တပ်မှူးတွေရော ရဲဘော်တွေရော ဘယ်သူမှမပါဘူး။ အခုက အဖွဲ့အစည်းကနေ အရေးယူ ထုတ်ထားတဲ့ နှစ်ယောက်ပဲ ထွက် သွားတဲ့ အနေအထားပဲ”လို့ ဧရာဝတီကို ပြောပါတယ်။
ရဲဘော် ခင်ကျော်နဲ့ ရဲဘော် ကျော်ကျော် (ကချင်) တို့အနေနဲ့ ABSDF ရဲ့ ချမှတ်ထားတဲ့ မူတွေကိုကျော်လွန်ပြီး UNRA အဖွဲ့အဖြစ် သီးခြားအဖွဲ့ ထူထောင်မှု၊ UPDF အဖွဲ့အစည်းအမည်ဖြင့် အစိုးရနဲ့ သီးခြား အပစ်အခတ်ရပ်စဲရေး လုပ်ရန် ကြိုးပမ်း တောင်းဆိုမှု၊ အဖွဲ့အစည်း အတွင်း ချမှတ်ထားတဲ့ လုပ်ငန်းစဉ်တွေနဲ့ စည်းကမ်းချက်တွေကိုမလိုက်နာမှု အဖွဲ့အစည်းအတွင်း ပြိုကွဲစေရန် ကြိုးပမ်း အားထုတ်မှုတွေ ရှိခဲ့တယ်လို့ ABSDF ထုတ်ပြန်ချက်မှာ တွေ့ရှိရပါတယ်။
ဒီဖြစ်ရပ်တွေနဲ့ပတ်သက်လို့ ဗဟိုစစ်ကော်မရှင်က ဖြေရှင်းနိုင်ဖို့ အကြိမ်ကြိမ်ကြိုးပမ်းခဲ့ပေမယ့် ရဲဘော် ခင်ကျော်နဲ့ ရဲဘော် ကျော်ကျော်တို့က လာရောက် ဖြေရှင်းခြင်း မပြုဘဲ သူတို့သဘောဆန္ဒနဲ့ သူတို့ ဆက်လက် ဆောင်ရွက်နေတာ ဖြစ်တယ်လို့လည်း ပါရှိပါတယ်။
ABSDF က အစိုးရနဲ့ အပစ်အခတ်ရပ်စဲရေး သဘောတူ လက်မှတ်ထိုးထားပြီး ဖြစ်ကြောင်း၊ အပစ်ရပ်ပြီးသား အဖွဲ့အစည်း တခုအောက် မှာ အဖွဲ့သစ်တခုတည်ထောင်ပြီး အပစ်ရပ်ရေး ထပ်လုပ်ဖို့ မဖြစ်နိုင်သလို ဦးကျော်ခင်တို့ သွားလိုတဲ့ အပစ်အခတ် ရပ်စဲရေး ရည်ရွယ်ချက်နဲ့ ABSDF မူနဲ့က ကွဲလွဲနေတယ်လို့ ဦးမျိုးဝင်း ကပြောပါတယ်။
“ABSDF က အပစ်အခတ် ရပ်စဲရေးလုပ်ခဲ့တယ်ဆိုတာက တိုင်းပြည်အတွက် နိုင်ငံရေး ပြဿနာကို နိုင်ငံရေးနည်းနဲ့ တွေ့ဆုံဆွေးနွေးအဖြေရှာနိုင်ဖို့ ကြိုးပမ်းတာ။ သူတို့ရည်ရွယ်ချက်က ဥပဒေဘောင်အတွင်းကနေ ဒေသဖွံ့ဖြိုးရေး လုပ်ငန်းလုပ်မယ် ဆိုတာ ပါတယ်။ ABSDF မှာ အဲဒီမူမရှိဘူးလေ။ လက်ရှိနိုင်ငံရေး ပြဿနာ မဖြေရှင်းနိုင်မခြင်း ဒီပုံစံအတိုင်းပဲ အဖွဲ့အစည်းကရှိမှာ”လို့ ဆိုပါတယ်။
ငြိမ်းချမ်းရေး လုပ်ငန်းစဉ်ကာလ အတွင်းမှာ ဗဟိုဦးစီးချုပ်ကိုင်မှုတွေ များလာသလို နိုင်ငံရေးနဲ့ မသက်ဆိုင်တဲ့ အပေးအယူတွေ များလာပြီး ရေရှည်မှာ ABSDF က ချမှတ်ထားတဲ့ မူဝါဒတွေအပေါ်မှာ တိတိကျကျ လိုက်နာလုပ်ကိုင်ဖို့အတွက် အခက်အခဲတွေ ရှိလာကြောင်း ရဲဘော် ဦးခင်ကျော် က သတင်းမီဒီယာတွေကို ပြောဆိုထားပါတယ်။
သူ့အနေနဲ့ ABSDF ရဲ့မူလက ချမှတ်ထားတဲ့ မူဝါဒတွေကို ထိထိရောက်ရောက် လုပ်ဆောင်နိုင်ဖို့အတွက် UNRA ကိုဖွဲ့စည်းခဲ့တာ ဖြစ် ကြောင်း ဒီလ ၆ ရက်နေ့က မွန်ပြည်နယ်မှာလုပ်တဲ့ သတင်းစာရှင်းလင်းပွဲမှာ သတင်းမီဒီယာတွေကို ပြောဆိုခဲ့ပါတယ်။
UNRA နဲ့ သက်ဆိုင်ရာဌာနတွေ တွေ့ဆုံဆွေးနွေးနိုင်ရေးအတွက် ဖွဲ့စည်းထားတဲ့ ပြည်သူ့ကျောင်းသား ငြိမ်းချမ်းရေးအဖွဲ့ (PPSA) ရဲ့ ဇူလိုင်လ ၁၄ ရက်နေ့ ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ဆီ ပို့တဲ့စာထဲမှာ ဦးခင်ကျော် ဦးစီးတဲ့ UNRA အဖွဲ့က တပ်မတော်နဲ့ စစ်မှန်သော ငြိမ်းချမ်းရေးအတွက် တွေ့ဆုံလိုကြောင်း တင်ပြထားတာကို တွေ့ရပါတယ်။
အဲဒီစာထဲမှာ ABSDF အဖွဲ့ အပစ်အခတ်ရပ်စဲရာမှာ သဘောထားမညီညွှတ်လို့ တရားဝင်အဖွဲ့ဝင် အဖြစ်က အနားယူပြီး တိုင်းရင်း သား လက်နက်ကိုင် အဖွဲ့အစည်းတွေနဲ့ မဟာမိတ်အဖြစ် သတ်မှတ်ပြီး ၂၀၁၄ မတ်လ ညီလာခံမှာ အနားယူခဲ့တဲ့ ခေါင်းဆောင်တွေနဲ့ စုဖွဲ့ထားကြောင်း၊ အများစုဟာ KNU/KNLA တပ်မဟာ (၅) ဖာပွန်ဒေသမှာ အခြေပြုထားကြောင်း၊ နိုင်ငံခြားရှိ ရဲဘော်တွေအပါအဝင် စုစုပေါင်း အင်အား ၃၀၀ ခန့်ရှိကြောင်း တင်ပြထားတာကို တွေ့ရပါတယ်။
ဒါ့အပြင် အစိုးရက ဒီမိုကရေစီ အပြည့်အဝ ကျင့်သုံးတဲ့အခါမှာ လက်နက်စွန့်လွှတ်ပြီး သာမာန် အရပ်သားအဖြစ် နေထိုင်သွားမှာ ဖြစ် သလို တွေ့ဆုံရာမှာလည်း ကိုယ်ကျိုးအခြေခံအခွင့်အရေးတွေကို မပြောဆိုဘဲ တိုင်းပြည် ပြုပြင်ပြောင်းလဲရေး အပြုသဘောဆောင် ကိစ္စရပ်တွေကိုသာ ဆွေးနွေးသွားမှာ ဖြစ်တယ်လို့ ဆိုပါတယ်။
PPSA ပြောရေးဆိုခွင့်ရှိသူ ဗိုလ်မှူး စောသန်းနိုင် က“အခုက ကျနော်တို့က ဘာတွေ ဆက် လုပ်ကြမလဲဆိုတော့ အမျိုးသား နိုင်ငံရေး ဦးတည်ချက်နဲ့ပဲ နဂိုကျောင်းသားတပ်မတော်က ချမှတ်ထားတဲ့ ဦးတည်ချက် လေးရပ် အတိုင်း ပြည်ထောင်စု ဖွံ့ဖြိုးရေးနဲ့ ငြိမ်းချမ်းရေး လုပ်ငန်းတွေကို လုပ်ဆောင်ဖို့အတွက် ရည်ရွယ်ထားပါတယ်ခင်ဗျ”လို့ ဧရာဝတီ ကို ပြောပါတယ်။
ရဲဘော် ခင်ကျော်နဲ့ ရဲဘော် ကျော်ကျော် (ကချင်) တို့ အသစ်ဖွဲ့စည်းထားတဲ့ အဖွဲ့ရဲ့ ကော်မတီမှာ ပါဝင်တဲ့ အဖွဲ့ဝင်တွေဟာလည်း ABSDF က ရဲဘော်တွေ မဟုတ်ကြောင်း ABSDF ဒုဥက္ကဋ္ဌ ဦးမျိုးဝင်း က ပြောပါတယ်။
ဒါ့အပြင် ABSDF မှာ တပ်ရင်း ၉ ရင်းရှိပြီး ဒီ ရဲဘော်ဟောင်းနှစ်ဦး ထုတ်ပယ်လိုက်တဲ့ ကိစ္စနဲ့ ပတ်သက်ပြီး အဖွဲ့အစည်းအတွင်းမှာ သဘောထား ကွဲမှုတွေ မရှိသလို၊ သက်ရောက်မှုတွေ မရှိဘူးလို့လည်း ပြောဆိုပါတယ်။
ABSDF ဟာ ရှစ်လေးလုံး လူထု အရေးတော်ပုံကနေ ပေါက်ဖွားလာတဲ့ အထင်ကရ ကျောင်းသားတပ်မတော်အဖွဲ့ ဖြစ်ပြီး အစိုးရနဲ့ ၂၀၁၃ ခုနှစ် သြဂုတ် လဆန်းပိုင်းမှာ ပဏာမ အပစ်အခတ်ရပ်စဲရေး လက်မှတ်ထိုးထားပြီး ဖြစ်ပါတယ်။
ဧရာဝတီ , KOLATT(PBDN)
RangonNewsDaily
0 comments:
Post a Comment