RangonNewsDaily: February . 28 .2014
လျှပ်စစ်မီး တစ်ယူနစ် ဈေးနှုန်းကို အစိုးရဈေးထက် အဆ ၂၀ အထိ ပေးဆောင်နေရသော တနင်္သာရီတိုင်းဒေသကြီးအတွင်း တစ်နိုင်ငံလုံး လျှပ်စစ်မီတာခ နှုန်းထားအတိုင်း ရရှိသည်အထိ ဆက်လက် ဆောင်ရွက်သွားမည် ဖြစ်ကြောင်း တနင်္သာရီ သယံဇာတ အကျိုးခံစားခွင့် ရရှိရေးကော်မတီ (ထားဝယ်) က သတင်းထုတ်ပြန်လိုက်သည်။
တနင်္သာရီ ကမ်းရိုးတန်းတွင် မြန်မာနိုင်ငံ၏ အဓိက သဘာဝ ဓာတ်ငွေ့သိုက်များ ထွက်ရှိကာ ထိုင်းနိုင်ငံသို့ ရောင်းချနေသော်လည်း တိုင်းဒေသကြီး မြို့တော်ထားဝယ်တွင် တစ်ယူနစ် ၄၇၀ ကျပ်မှ အချို့နေရာများတွင် ကျပ် ၇၀၀ အထိ အသီးသီး ပေးဆောင်နေရမှုကြောင့် ယင်းကော်မတီက သုံးလအတွင်း လက်မှတ် သုံးသိန်းကျော် ကောက်ယူကာ တောင်းဆိုရန် စီစဉ်လျက် ရှိသည်။
ယင်းအချိန်တွင်း တနင်္သာရီတိုင်း ကံပေါက်ဒေသမှတစ်ဆင့် ထိုင်းနိုင်ငံသို့ တင်ပို့လျက်သော ဇောတိက သဘာဝဓာတ်ငွေ့ စီမံကိန်းမှ မဂ္ဂါဝပ် ၅၀ ဝယ်ယူ ဖြန့်ဖြူးခွင့်ကို တိုင်းအစိုးရသို့ ပြည်ထောင်စုအစိုးရက ခွင့်ပြုလိုက်ပြီ ဖြစ်ကြောင်း တိုင်းဒေသကြီး လျှပ်စစ်ဝန်ကြီး ဦးဝင်းဆွေက ပြောကြားသည်။
ယင်းစီမံကိန်းမှ ဝယ်ယူဖြန့်ဖြူးမည့် နှုန်းထားမှာ တစ်ယူနစ်ကျပ် ၂၀၀ ကျော် ဖြစ်နိုင်ကြောင်း တိုင်းအစိုးရက ဆိုထားသည်။
ယင်းကြောင့် ကော်မတီအနေနှင့် တစ်နိုင်ငံလုံးတွင် ဖြန့်ချိနေသော ဈေးနှုန်းနှင့် တစ်ပြေးညီ မရမချင်း လှုပ်ရှားမှုများကို အရှိန်မြှင့်တင်သွားမည် ဖြစ်ကြောင်း ကော်မတီက ဆိုထားသည်။
တနင်္သာရီ သယံဇာတ အကျိုးခံစားခွင့် ရရှိရေး ကော်မတီကို အမျိုးသား ဒီမိုကရေစီ အဖွဲ့ချုပ် (NLD)၊ ထားဝယ် တိုင်းရင်းသားများပါတီ၊ ၈၈ မျိုးဆက် ငြိမ်းချမ်းရေးနှင့် ပွင့်လင်း လူ့အဖွဲ့အစည်း (ထားဝယ်)၊ ထားဝယ် ဖွံ့ဖြိုးရေးအဖွဲ့တို့ အပါအဝင် စုစုပေါင်းအဖွဲ့ ၁၄ ဖွဲ့မှ ကိုယ်စားလှယ် ၂၅ ဖြင့် ထားဝယ်မြို့တွင် ဖွဲ့စည်းထားသည်။
ထိုနည်းတူ ထားဝယ် တိုင်းရင်းသားများ ပါတီကလည်း သဘာဝဓာတ်ငွေ့မှ လျှပ်စစ် ဓာတ်အားရရှိရေး ကိစ္စ တွေ့ဆုံဆွေးနွေးရန် တိုင်းဒေသကြီး အစိုးရ ဝန်ကြီးချုပ်ကို တွေ့ဆုံခွင့် တောင်းခံထားကြောင်း ယင်းပါတီ ဗဟိုအလုပ်အမှုဆောင် ကော်မတီ ဥက္ကဋ္ဌ ဦးအေးမင်းက ပြောကြားသည်။
The Voice , kolatt(PBDN)
RangonNewsDaily
0 comments:
Post a Comment