တောင်ကြီးတန်ဆောင်တိုင် မီးပုံးပျံပြိုင်ပွဲ တွင် ညလွှတ်မီးကြီး ပထမဆုကို ငွေကျပ် သိန်း ၆၀ ချီးမြှင့်မည်

RangonNewsDaily:: October . 20 .2014
မြန်မာနိုင်ငံ၏ အထင်ကရ ပွဲတော်တစ်ခု ဖြစ်သည့် တောင်ကြီး တန်ဆောင်တိုင် ပွဲတော် မီးပုံးပျံပြိုင်ပွဲ ကို ၂ဝ၁၄ ခုနှစ် အောက်တိုဘာ ၃ဝ ရက်မှ နိုဝင်ဘာ ၆ ရက်အထိ ကျင်းပ ပြုလုပ်မည် ဖြစ်ပြီး ညလွှတ်မီးကြီး ပြိုင်ပွဲ၌ ပထမဆုကို ငွေကျပ် သိန်း ၆ဝ သတ်မှတ်ချီးမြှင့် ပေးသွားမည်ဟု တန်ဆောင်တိုင် ပွဲတော် ကျင်းပရေး ကော်မတီမှ သိရသည်။
၂ဝ၁၃ ခုနှစ် မီးပုံးပျံပြိုင်ပွဲ ညလွှတ်မီးကြီး ပြိုင်ပွဲတွင် ပထမဆု ကို ငွေကျပ် ၄၅ သိန်း၊ ဒုတိယဆု ကို ငွေကျပ် ၃၅ သိန်း၊ တတိယဆု ကို ငွေကျပ်သိန်း ၃ဝ၊ စတုတ္ထဆု ကို ငွေကျပ် ၂၅ သိန်း၊ ပဉ္စမဆု ကို ငွေကျပ် ၂၁ သိန်းနှင့် ဂုဏ်ပြုဆုကို ငွေကျပ် ငါးသိန်း သတ်မှတ် ချီးမြှင့် ခဲ့သည်။

ယခုနှစ် တောင်ကြီး တန်ဆောင်တိုင် ပွဲတော် မီးပုံးပျံပြိုင်ပွဲ တွင် ညလွှတ်မီးကြီး ပြိုင်ပွဲတွင် ပါဝင်ယှဉ် ပြိုင်ရန် ညလွှတ်မီးကြီး ၈၅ လုံးကို အောက်တိုဘာ ၁၆ ရက်အထိ ပြိုင်ပွဲ ဝင်စာရင်းတွင် လက်ခံရရှိ ထားပြီး ဖြစ်သည်။ ယမန်နှစ် မီးပုံးပျံပြိုင်ပွဲ တွင် ညလွှတ်မီးကြီး ၆၈ လုံး ပါဝင် ယှဉ်ပြိုင် ခဲ့သည့်အတွက် ယခုနှစ် တွင် ပြိုင်ပွဲဝင် အရေအတွက် ပိုမို တိုးမြင့် လာသည်ဟု သိရသည်။ အောက်တိုဘာ ၁၆ ရက်ထိ ရရှိထားသော စာရင်းများအရ ညလွှတ် စိန်နားပန် ပြိုင်ပွဲတွင် ပြိုင်ပွဲဝင် မီးပုံး ၃၆ လုံး ပါဝင်ယှဉ်ပြိုင် ရန် စာရင်းရရှိ ထားသည်ဟု သိရသည်။

တောင်ကြီး တန်ဆောင်တိုင် ပွဲတော်တွင် မီးပုံးပျံ ပြိုင်ပွဲအဖြစ် ညလွှတ်မီးကြီး ပြိုင်ပွဲ၊ စိန်နားပန် ပြိုင်ပွဲ၊ အရုပ်ပြိုင်ပွဲ (အုပ်စုလိုက် ပြိုင်ပွဲ) အဖြစ် သတ်မှတ်ထားပြီး အရုပ်ပြိုင်ပွဲ (ဝဲပုံ) တွင် ခြေလေးချောင်း အရုပ်ပြိုင်ပွဲ နှင့် ခြေနှစ်ချောင်း အရုပ်ပြိုင်ပွဲ ဟူ၍ ခွဲခြား သတ်မှတ် ထားသည်ဟု သိရသည်။

အဆိုပါ ပြိုင်ပွဲများ အပြင် မီးပဒေသာ လှည့်ပြိုင်ပွဲ၊ အလွတ်တန်း ဓာတ်ပုံပြိုင်ပွဲ (ဓာတ်ပုံပြိုင်ပွဲ တွင် မီးပုံးပျံ ပြိုင်ပွဲ အမျိုးအစား တစ်ခုချင်း အလိုက် ဝင်ပြိုင်နိုင်သည့် ပြိုင်ပွဲ အမျိုးအစား များကို ခွဲခြား သတ်မှတ် ထားသည်)၊ မြို့လုံးကျွတ် ဘုံကထိန် ပဒေသာပင် လှည့်လည်ပွဲ နှင့် ရပ်ကွက်မီး အလှဆင် ထွန်းညှိ ထားရှိမှု ပြိုင်ပွဲများလည်း ပါဝင်ပြီး ဆုများချီးမြှင့် သွားမည် ဖြစ်ကြောင်း သိရသည်။

Themyawady, KOLATT(PBDN)
RangonNewsDaily