Sky Net ထံမှ အကျိုးအမြတ်ဝေစု တိုးတောင်းမည်ဟု ပြန်ကြားရေး ဝန်ကြီးဌာနဆို

RangonNewsDaily: May . 31 .2014
သုံးဆယ်သုံးနှစ်ကြာ ရုပ်သံထုတ်လွှင့်ခွင့် သဘောတူစာချုပ်တွင် အစိုးရ၏ အကျိုးအမြတ်ဝေစု နည်းလွန်းသည်ဟု ဝေဖန်ခံနေရသော ပြန်ကြားရေး ဝန်ကြီးဌာနက Sky Net (ရွှေသံလွင်မီဒီယာ ကုမ္ပဏီလီမိတက်) နှင့် ချုပ်ဆိုထားသော စာချုပ်ကို ပြန်ပြင်၍ အကျိုးအမြတ် ဝေစုကို ထပ်တိုး တောင်းခံမည် ဖြစ်ကြောင်း မြန်မာ့အသံနှင့် ရုပ်မြင်သံကြား ညွှန်ကြားရေးမှူးချုပ် ဦးတင့်ဆွေက ပြောကြားသည်။
နေပြည်တော် ပြန်ကြားရေး ဝန်ကြီးဌာန အဆောက်အအုံ၌ မေလ ၃၀ ရက်နေ့က ပြုလုပ်သော သတင်းစာ ရှင်းလင်းပွဲတွင် ၎င်းက အထက်ပါအတိုင်း ပြောဆိုခြင်း ဖြစ်သည်။

“ဆတိုးနဲ့ တောင်းသွားမှာပါ။ အဲ့ဒီအတွက် ပြင်ချုပ်မယ့် စာချုပ်မူကြမ်းကို ဇွန်လမှာ ရှေ့နေချုပ်ရုံးကို ပို့ပြီး အစိုးရအဖွဲ့အထိ အဆင့်ဆင့် တင်ပြအတည်ပြုဖို့ လုပ်နေပါတယ်” ဟု ဦးတင့်ဆွေက ဆိုသည်။

၂၀၁၀ ပြည့်နှစ် ဇူလိုင်လအတွင်း ပြန်ကြားရေး ဝန်ကြီးဌာနနှင့် ရွှေသံလွင် ကုမ္ပဏီတို့ ရုပ်သံ ထုတ်လွှင့်ခွင့်ဆိုင်ရာ သဘောတူစာချုပ် ချုပ်ဆိုခဲ့ရာတွင် လုပ်ငန်း လုပ်ကိုင်ခွင့် ၃၃ နှစ်အထိ ခွင့်ပြုထားခြင်း၊ ပထမသုံးနှစ်တွင် အကျိုးအမြတ် ခွဲဝေပေးရန် မလိုကြောင်း ခွင့်ပြုထားခြင်း၊ အကျိုးအမြတ် ခွဲဝေရာတွင်လည်း ၄ ရာခိုင်နှုန်းမှ စတင် ကောက်ခံ၍ ငါးနှစ်တစ်ကြိမ် ၄ ရာခိုင်နှုန်းသာ ထပ်မံတိုးမြှင့် တောင်းခံရန် သဘောတူထားခြင်းတို့ကြောင့် အဆိုပါစာချုပ်ကို ဝေဖန်နေကြခြင်း ဖြစ်သည်။

ယင်းနှင့် ပတ်သက်၍ မူလ သဘောတူစာချုပ်ကို ခေတ်ကာလနှင့် လိုက်လျောညီထွေ ဖြစ်စေရန် ပြန်လည်ပြင်ဆင် ချုပ်ဆိုမည် ဖြစ်ပြီး ကုမ္ပဏီကလည်း သဘောတူထားကြောင်း၊ ပြင်ဆင်မည့် စာချုပ်တွင် နိုင်ငံတော်အတွက် အကျိုးအမြတ် ဝေစုကို သေချာပေါက် တိုးမြှင့် တောင်းခံမည် ဖြစ်ကြောင်း ပြန်ကြားရေး ဝန်ကြီးဌာနက ပြောဆိုသည်။

ရွှေသံလွင် ကုမ္ပဏီကမူ ပြန်ကြားရေး ဝန်ကြီးဌာနနှင့် ချုပ်ဆိုသော သဘောတူစာချုပ်တွင် အကျိုးအမြတ် ခွဲဝေမှု ကိစ္စရပ်မှာ ကုမ္ပဏီ၏ ရင်းနှီးမြှုပ်နှံမှုပမာဏနှင့် သက်ဆိုင်ကြောင်း၊ ရုပ်သံကြော်ငြာခမှာလည်း မီဒီယာအချို့တွင် ရေးသား ဖော်ပြနေသကဲ့သို့ အများအပြား မရရှိကြောင်း ထုတ်ပြန် ရှင်းလင်းသည်။

ပုဂ္ဂလိက ရုပ်သံထုတ်လွှင့်ခွင့်ကို ရွှေသံလွှင်နှင့် Forever ကုမ္ပဏီ နှစ်ခုကသာ ရရှိထားသဖြင့် ရုပ်သံကြည့်ရှုသူ အများပြည်သူတွင် ရွေးချယ်ပိုင်ခွင့် မရှိကြောင်း၊ ဈေးနှုန်း သတ်မှတ်ချက် ကြီးမြင့်မှုကြောင့် ဝန်ထုပ်ဝန်ပိုးများ ဖြစ်ပေါ်နေကြောင်း သတင်းစာ ရှင်းလင်းပွဲ တက်ရောက်သူများက ထောက်ပြသော်လည်း ရုပ်သံထုတ်လွှင့်ခွင့်ကို ထပ်မံခွင့်ပြုရန် မရှိကြောင်းသာ ဦးတင့်ဆွေက ပြောဆိုသည်။

ပြန်ကြားရေး ဝန်ကြီးဌာန၏ ပြောဆိုချက်အရ ရုပ်သံထုတ်လွှင့်ခွင့် လိုင်စင်များ ထပ်မံခွင့်ပြုရန် ရုပ်သံ ထုတ်လွှင့်ခြင်းဆိုင်ရာ ဥပဒေတစ်ရပ် အတည်ပြု ပြဋ္ဌာန်းနိုင်ရန် လိုအပ်ပြီး အဆိုပါ ဥပဒေကြမ်းမှာ အမျိုးသားလွှတ်တော်သို့ ဆွေးနွေးရန် ရောက်ရှိပြီး ဖြစ်ကြောင်း ယင်းဝန်ကြီးဌာနထံမှ သိရသည်။

The Voice , KOLATT(PBDN)
RangonNewsDaily