ကယားပြည်နယ် ကျေးရွာ ၅၀ နီးပါး မီးလင်းရေး စီမံကိန်းစတင်

RangonNewsDaily:: September 21, 2013

ကယားပြည်နယ်က ကျေးရွာပေါင်း ၄၇ ရွာကို ၂၀၁၃/၂၀၁၄ ဘဏ္ဍာရေးနှစ်အတွင်း လျှပ်စစ်မီးရအောင်ဆောင်ရွက်ပေးဖို့ ကယားပြည်နယ် လျှပ်စစ်ဝန်ကြီးဌာနက ခွင့်ပြုထားပြီဖြစ်ကြောင်း ကယားပြည်နယ် ဝန်ကြီးချုပ် ဦးခင်မောင်ဦးက ပြောပါတယ်။ မနေ့က လွိုင်ကော်မြို့ မြို့တော်ခန်းမမှာကျင်းပတဲ့ လယ်ယာမြေ စီမံခန့်ခွဲအသုံးချမှု၊ ကျေးရွာမီးလင်းရေးနဲ့ သောက်သုံးရေရရှိနိုင်ရေး တွေ့ဆုံပွဲမှာ ဝန်ကြီးချုပ် ဦးခင်မောင်ဦးက ပြောကြားခဲ့တာပါ။

ကယားပြည်နယ် လွိုင်ကော်မြို့ နယ်က ၁၄ ရွာ ၊ ဒီမောဆိုမြို့ နယ်က ရွာပေါင်း ၂၀ နဲ့ ဖရူဆိုမြို့နယ်က ၁၃ ရွာမှာ လျပ်စစ်မီးရဖို့အတွက် ၁၁ KV ကေဗွီ ဓါတ်အားလိုင်း တပ်ဆင်ပေးသွားမှာဖြစ်တယ်လို့ သိရပါတယ်။ အဲဒီကျေးရွာတွေအတွက် မီးပေးရေးအစီအစဉ်ကို မဟာငွေတောင်ကုမ္ပဏီ၊ ကောင်းဝင့်စံကုမ္ပဏီနဲ့  ဦးကြည်သိန်းကုမ္ပဏီတို့က ဆောက်လုပ်ခွင့်ခွင့်ပြုချက် ရရှိထားတယ်လို့ သိရပါတယ်။

ကယားပြည်နယ်မှာ ကျေးရွာပေါင်း ၅၁၁ ရွာရှိပြီး လက်ရှိအချိန်မှာ ကျေးရွာ ၁၀၈ ရွာမှာ လျှပ်စစ်မီးရရှိနေပြီး ရွာပေါင်း ၄၀၀ အထိ မီးလင်းရေးစီမံကိန်းတွေ ပြင်ဆင်နေပြီလို့ ကယားပြည်နယ်အစိုးရက ပြောပါတယ်။

ကယားပြည်နယ်မှာ လောပိတ ရေအားလျှပ်စစ်ဓါတ်အားထုတ်လုပ်ရေး စီမံကိန်းကြီးရှိပေမယ့် ဒေသခံပြည်သူတွေအတွက် လျှပ်စစ်ဓါတ်အား မရရှိတာကြောင့် KNPP ကရင်နီအမျိုးသားလွတ်မြောက်ရေးပါတီ အပါအ၀င် အဖွဲ့အစည်းအတော်များများက ယခင်စစ်အစိုးရအဆက်ဆက်ကို ပြစ်တင်ဝေဖန်ခဲ့ကြပါတယ်

RFA , RangonNewsDaily
kolatt (Pabedan)