 |
ပဲခူးတိုင်းဒေသကြီးအနောက်ပိုင်း
၂၀၁၂ ခုနှစ် ဒီဇင်ဘာလ (၂၉) ရက်နေ့ မနက် (၅) နာရီခွဲခန့်က ခလရ (၉၂)
တပ်ရင်းဟာ ရှေ့တန်း စစ်မြေပြင်အနေနဲ့ တိုက်ပွဲဖြစ်ပွားရာ ကရင်ပြည်နယ်ကို
စစ်ဆင်ရေးရှေ့တန်း သွားရမှာဖြစ်ပြီး ရှေ့တန်းတိုက်ခိုက်ရေး စာရင်းမှာ
တပ်သားထွန်းမင်းဇော်လည်း ပါဝင်ပါတယ်။ရှေ့တန်းမထွက်ခွာမှီ ဒီဇင်ဘာလ (၂၈) ရက်နေ့ညက တပ်သားထွန်းမင်းဇော်ဟာ အဲဒီတပ်အနီးမှာရှိတဲ့ စားသောက်ဆိုင်တစ်ဆိုင်မှာ အရက်သောက်ခဲ့ကြောင်း သိရပါတယ်။
ဒီဇင်ဘာလ (၂၉) ရက်နေ့ မနက်ငါးနာရီခွဲခန့်က ရှေ့တန်းကို ထွက်ဖို့ လူစစ်တန်းစီချိန်မှာ တပ်သားထွန်းမင်းဇော် မရှိကြောင်း သိရပြီး ပျောက်ဆုံးနေကြောင်း သတင်းပို့ပါတယ်။ တပ်မှတာဝန်ရှိသူများက အဲဒီစစ်သည်ကို လိုက်လံရှာဖွေဖမ်းဆီးကာ စုံစမ်းစစ်ဆေးမှုများ ပြုလုပ်ခဲ့ပါတယ်။ အဲဒီနောက် ကြမ်းတမ်းစွာ စစ်ကြောခဲ့တဲ့အတွက် နာရီပိုင်းအတွင်းမှာပဲ အဲဒီစစ်သည် ကွယ်လွန်သွားကြောင်း ဗဟိုကင်းတဲမှ တာဝန်ကျ ရဲဘော်များက တပ်တွင်းမိသားစုဝင်များကို ပြောပြခဲ့ကြောင်း သိရပါတယ်။
မသေဆုံးခင် တပ်သားထွန်းမင်းဇော်အား ပန်းတောင်းမြို့နယ် ပြည်သူ့ဆေးရုံကို ပို့ဆောင်ပေးခဲ့သေးကြောင်း တပ်ကြပ်ကြီး တစ်ဦးမှ စည်းလုံးခြင်းရဲ့အင်အား ဝက်ဘ်ဆိုဒ် www.photayokeking.org ကို ပြောပြပါတယ်။
ပန်းတောင်းမြို့နယ် ပြည်သူ့ဆေးရုံမှ ဆေးရုံအုပ်ကြီး ဒေါက်တာဒေါ်ခင်မေအုပ် ပြောကြားရာမှာတော့ ဆေးရုံ မရောက်ခင်ကတည်းက သေဆုံးနေကြောင်းနဲ့ အသည်းကြီးနေကြောင်းနဲ့ နှလုံးမကောင်းကြောင်းလည်း ပြောဆိုခဲ့တယ်လို့ ဆိုပါတယ်။
သေဆုံးသူ တပ်သားထွန်းမင်းဇော်ကို သေဆုံးတဲ့နေ့ ဒီဇင်ဘာလ (၃၀) ရက်နေ့မှာပဲ တပ်တွင်းမှာ မီးသင်္ဂြိုလ်လိုက်ပြီး မိသားစုဝင်များကို ယနေ့အထိ တရားဝင်အသိပေး ပြောကြားထားတာ မရှိကြောင်း သိရပါတယ်။
မိသားစုဝင်များအနေနဲ့ မီးသင်္ဂြိုလ်မှု မပြုလုပ်ခင် နောက်ဆုံးအချိန်မှာလည်း တွေ့ခွင့်မရကြောင်း၊ အခုထိလည်း တရားဝင်အသိပေး အကြောင်းကြားတာမျိုး မရှိသေးသလို တပ်တွင်းမှ မိသားစုဝင်တချို့က ဆက်သွယ်ပြီး ပြောပြမှ သေဆုံးခဲ့တဲ့သတင်းအား သိရတဲ့အပေါ် စိတ်မကောင်း ဖြစ်ရတယ်လို့ ဆိုပါတယ်။ တပ်တွင်းမှာတော့ တပ်သား ထွန်းမင်းဇော် သေဆုံးမှုနဲ့ ပတ်သက်ပြီး စစ်ဆေးမေးမြန်းရင်း လက်လွန်သွားတယ်လို့ သိရပါတယ်။ တပ်မှ တာဝန်ရှိသူများကို မေးမြန်းချိန်မှာလည်း တစ်ယောက်တစ်မျိုး ပြောဆိုနေလို့ သံသယဖြစ်ကြောင်း ခလရ (၉၂) တပ်ရင်းကို ကိုယ်တိုင် သွားရောက်စုံစမ်းခဲ့သူ မိသားစုဝင်တစ်ဦးက အခုလို ပြောပါတယ်။
“ကျွန်မရဲ့မောင်လေးက အပြစ်ကျူးလွန်တယ်ဆိုရင် ဥပဒေအတိုင်း ဆုံးမပေါ့။ အခုဟာက သူတို့ဘက်က လက်လွန်တာ မဟုတ်ဘူးဆိုရင် ထွန်းမင်းဇော်ရဲ့ နောက်ဆုံးခရီးကိုတော့ မိသားစုဝင်တွေ လာပို့နိုင်အောင် စီစဉ်ပေးသင့်တယ်။ ဆရာဝန်ကြီးကပြောတော့ အသဲကြီး၊ နှလုံးမကောင်းဘူးတဲ့၊ အဲဒီလို ကျန်းမာရေး မကောင်းတဲ့ လူတစ်ယောက်ကို ရှေ့တန်းပို့တယ်ဆိုတာ တော်တော် လူမဆန်တဲ့ လုပ်ရပ်ပဲလို့ ကျမမြင်တယ်။ နောက်ပြီး ဓါတ်ပုံတွေနဲ့ ဆေးစစ်ချက်တွေ တောင်းတော့လည်း ဆေးရုံက စစ်တပ်ကို မပို့သေးဘူးလို့ ပြောတယ်။ ဆေးရုံကလည်း စစ်တပ်ကို ပို့လိုက်ပြီလို့ ဆေးရုံအုပ်ကြီးကိုယ်တိုင်က ပြောပြန်တယ်”
တပ်မိသားစုဝင်များရဲ့ လူမှုရေးအရ ဆက်သွယ် အကြောင်းကြားမှုကြောင့် သေဆုံးကြောင်း သိရသလို တာဝန်ရှိသူများ အနေနဲ့ ဘယ်လိုသေဆုံးကြောင်း၊ နောက်ဆုံးလစာ၊ ပင်စင်ကိစ္စများမှအဆုံး ယခုအချိန်ထိ တစုံတရာပြောဆိုမှု မရှိတာကိုလည်း တပ်သား ထွန်မင်းဇော်ရဲ့အမက ဆက်ပြောပါတယ်။
“ပန်းတောင်းမီးသင်္ဂြိုလ်စက်မှာ မီးသင်္ဂြိုလ်တယ်လို့ သူတို့ပြောတယ်။ ပန်းတောင်းမှာ မီးသင်္ဂြိုလ်စက် မရှိဘူးဆိုတာ ကျွန်မတို့သိတယ်။ တပ်ထဲမှာပဲ ထင်းပုံပေါ်တင်ပြီး မီးသင်္ဂြိုလ်လိုက်တာလို့ တပ်ထဲက ထွန်းမင်းဇော် သူငယ်ချင်းတွေက ပြောတယ်။ သေတဲ့နေ့မှာပဲ ဖုတ်ပူမီးတိုက် မီးသင်္ဂြိုလ်တာ လုပ်လိုက်တယ်လို့ သိရတယ်။ ဆေးရုံကြီးက ဆေးစာရွက်မပါပဲ လုပ်ချင်သလို လုပ်နေပါတယ်။ လူနာ သေ၊ မသေ၊ မသိရသေးပဲ မီးသင်္ဂြိုလ်တယ်ဆိုတာ လိမ်ညာပြီး ထင်းပုံပေါ် မီတင်ရှို့တာက တကယ်တော့ တိရိစ္ဆာန်တစ်ကောင်လို အလုပ်ခံရတဲ့သဘော ဖြစ်နေလို့ ကျွန်မ တော်တော်လေး စိတ်မကောင်းဖြစ်မိတယ်။ ကျွန်မမောင်လေးရဲ့ ရွှေလက်စွပ်လည်း ပြန်မရတော့ဘူး။ ဘာဆိုဘာမှ ပွင့်လင်းမြင်သာမှု မရှိဘူး၊ တာဝန်ရှိတဲ့ အရာရှိတွေကိုယ်တိုင် တစ်ယောက်တစ်မျိုးစီ ပြောကြတယ်။
ခလရ (၉၂) တပ်မှာ ယာယီတပ်ရင်းမှူးအဖြစ် ဗိုလ်မှူး မျိုးမင်းထွန်းမှ တာဝန်ယူထားကြောင်း သိရပါတယ်။ အခုလို တပ်သားထွန်းမင်းဇော် သေဆုံးမှုနဲ့ ပတ်သက်ပြီး ခလရ (၉၂) တပ်ရင်းမှ တာဝန်ရှိသူများကို စည်းလုံးခြင်းရဲ့အင်အား ဝက်ဘ်ဆိုဒ်က သတင်းယူ မေးမြန်းခဲ့ပေမဲ့ သူတို့အနေနဲ့ ဖြေဆိုဖို့ ငြင်းဆန်ခဲ့ကြောင်း၊ တပ်မတော်အတွင်း ဖိနှိပ်ညှင်းပန်းမှုနှင့် လူ့အခွင့်အရေး ချိုးဖောက်မှုများ အပါအဝင် စစ်သည်များရဲ့မိသားစု မှီခိုအခွင့်အရေး ဆုံးရှုံး နစ်နာနေကြောင်း သတင်းပေးပို့သွားပါတယ်။
No comments:
Post a Comment