July 31, 2024
ပဲခူးရေဘေးကြောင့် ကယ်ဆယ်ရေးစခန်းမှာ နေကြရတဲ့ ဝင်ငွေနည်းပြည်သူတွေ ထမင်းထုပ်နဲ့ သောက်ရေ မလုံလောက်လို့ အခက်အခဲ ကြုံတွေ့နေရပါတယ်။
ပြီးခဲ့တဲ့ ၅ ရက်တာအတွင်း ပဲခူးမြစ်ရေကြီးလာလို့ နေအိမ်တွေ ရေနစ်မြုပ်ကုန်ပြီး ကယ်ဆယ်ရေးစခန်းကို ရောက်လာကြရတဲ့ ပဲခူးမြို့နဲ့အနီးတဝိုက်က လက်လုပ်လက်စား ဒေသခံတွေမှာ ထမင်းထုပ်နဲ့ သောက်သုံးရေ မလုံလောက်တဲ့ အခက်အခဲ ဖြစ်နေကြပါတယ်။
ဇူလိုင် ၃၀ ရက်ညက မိသားစု ၅ ယောက်စာအတွက် ထမင်းတထုပ်ပဲ ရခဲ့တယ်လို့ ကျီးနီကန် ကယ်ဆယ်ရေးစခန်းမှာ ရောက်ရှိနေတဲ့ ဒေသခံတဦးက ပြောပါတယ်။
“ကျီးနီကန်ကယ်ဆယ်ရေးစခန်းမှာနေတာ။ အိုးလေးစုအပိုင်မှာနေတာ အိမ်တွေက မြုပ်သွားတော့။ မနေ့ကဆိုလို့ရှိရင် ညနေ ၄ နာရီကမှ ထမင်းတထုတ်ပဲရတယ်။ အိမ်ထောင်စုတစုကို တထုပ်ပဲ။ ကျနော့်မှာ မိသားစု ၅ ယောက်ရှိလည်း တထုပ်ပဲ။ ကိုယ့်ပိုက်ဆံရှိမှ အဆင်ပြေမယ်။ အခုရေတွေက ကြီးနေတော့ အလုပ်ကလည်း ပိတ်ထားတော့ စားဝတ်နေရေး အဆင်မပြေဘူး။ နေရာထိုင်ခင်းတွေကလည်း ပြည့်ကြပ်နေတယ်။ စားဝတ်နေရေးက အဆင်မပြေဘူး။ ကျနော် အခုထွက်လာတဲ့အချိန်ထိ ထမင်းထုပ် တထုပ်မှ မရဘူး။ ပိုက်ဆံမရှိလို့ နည်းနည်းပါးပါးသိကျွမ်းတဲ့သူဆီမှာ လိုက်ချေးကြည့်မယ်ဆိုပြီးထွက်လာတာ။ ကိုယ့်ပိုက်ဆံရှိမှ ချက်ပြုတ်ပြီးစားလို့ရမယ်။”
အခုနှစ် ပဲခူးရေကြီးရာမှာ ရန်ကုန် - မန္တလေးလမ်းဟောင်းပေါ်ရှိ ပဲခူးမြစ်ကူးတံတားအနီးနဲ့ ရွှေသာလျောင်း ဘုရားလမ်းဆုံအနီးမှာ မြစ်ရေအရှိန်နဲ့ ဖြတ်သန်းစီးဆင်းနေသလို လူတွေကလည်း ကြိုးတန်းတွေကို ဆွဲကိုင်ပြီး သက်စွန့်ဆံဖျားကူး သွားလာနေကြပါတယ်။ အရင်က ကားနဲ့သွားခဲ့တဲ့ လမ်းမကြီးတွေပေါ်မှာ ကူးတို့လှေတွေ ဖြတ်သန်းသွားလာနေပြီး ရေစီးအရှိန်ကြောင့် ဖြတ်သန်းသွားလာဖို့ အခက်အခဲရှိတဲ့သူတွေအား လှေတစီးကို ကျပ် ၅၀၀၀ သတ်မှတ်ပြီး လိုက်လံပို့ဆောင်ပေးနေကြပါတယ်။
မနှစ်ကလည်း ကြုံခဲ့ရတဲ့ ပဲခူးရေဘေးမှာ အလှူရှင်အများအပြားလာရောက်ခဲ့ပေမဲ့ ဒီနှစ်မှာတော့ လာရောက်လှူဒါန်းတဲ့ အလှူရှင်တွေနည်းပါးရတာက အလှူရှင်နဲ့ အကူညီလိုအပ်နေသူတွေကို တိုက်ရိုက်ပေးလှူတာကို စစ်ကောင်စီက တားမြစ်ထားတဲ့အတွက် အခက်အခဲတွေကို ပိုပြီးဖြစ်စေတယ်လို့ ကယ်ဆယ်ရေးအဖွဲ့မှာ ပါဝင်သူတဦးက ပြောပါတယ်။
“မရဘူးဆိုတာက ကျနော်တို့က အခုအစ်မတို့က လှူချင်တယ်ဆိုရင် အစိုးရနဲ့တိုက်ရိုက်ချိတ်ပေးရ တယ်။ အစိုးရနဲ့တွေ့ဆုံပြီးတော့ ကျနော်တို့က ပြန်လှူရတယ်။ အရင်ပုံစံလို လှူချင်တိုင်း လှူလို့ အဆင်မပြေတော့ဘူး၊ အခက်အခဲတော့ဖြစ်တာပေါ့။”
ဒါကြောင့် တဦးချင်းကူညီထောက်ပံ့သူတွေအပြင် ပရဟိတအဖွဲ့လိုက် ကူညီထောက်ပံ့ လိုသူတွေ နည်းပါးလာပေမဲ့ အကူအညီကို မျှော်ကြသူတွေကလည်း ရေလွတ်ရာနေရာတွေမှာ လာရောက် စောင့်ဆိုင်းနေကြတာလည်း ရှိပါတယ်။
လတ်တလော ပဲခူးရေဘေးအတွက် လှူဒါန်းထားတဲ့ ထမင်းထုပ်တွေကို ပြန်လည်ဝေငှပုံနဲ့ ပတ်သက်ပြီး ရေဘေးဒုက္ခသည်တဦးက အခုလိုရှင်းပြပါတယ်။
“အုပ်စုက ကျနော်သိသလောက် အိုးလေးစုက ၁၊ ၂၊ ၃ ရှိတယ်။ ဇာဝနရှိတယ်။ ကြေးနီကန်ရှိတယ်။ အဲ့မှာရေမြုပ်တဲ့သူတွေ လာနေတာ အိမ်ထောင်စုပေါင်း ၅၀၀၀ ကျော်လား မသိဘူး။ အဲ့ဒီမှာရှိတဲ့ ဥစ္စာမှာ ထမင်းထုပ်လာဝေတယ်။ လာလှူတဲ့အခါကျရင် လူဦးရေနဲ့ကြည့်လိုက်တယ်။ အိမ်ထောင်စုတစုကို တထုပ်ပေးမယ်ဆိုတော့ မလောက်တော့ မဲနှိုက်လိုက်တယ်။ ဒီလူကြီးအပိုင်က ပေါက်တယ်ဆိုရင် ဒီလူကြီးအပိုင်က အရင်ဝေ၊ သူ့အပိုင်က ပေါက်လို့ရှိရင် သူ့အပိုင်ကိုလှူ။ ၃ စုမှာ ပြတ်သွားတယ်ဆိုရင် ပြတ်တဲ့နေရာက ခဏစောင့် နောက်ထပ်ထမင်းထုပ်လာမှ ကျန်တဲ့လူက ထပ်ယူဆိုတော့ အိမ်ထောင်စုတစုမှာ ၅ ဦးရှိလည်း တထုပ်ပဲ ရမယ်။”
လတ်တလော ပဲခူးရေဘေးကြောင့် ဆက်သွယ်ရေးလမ်းတွေ ပြတ်တောက်နေသလို လိုင်းကား၊ ကုန်ကားနဲ့ စက်သုံးဆီ သယ်ဆောင်ရေး စတဲ့ မော်တော်ယာဉ်တွေက ရန်ကုန် -မန္တလေးလမ်းဟောင်းကို အသုံးမပြုနိုင်တော့ဘဲ ညောင်အင်းလမ်းခွဲကတဆင့် ပဲခူးစက်မှုဇုန် ဂိတ် ၃ လမ်းကို အသုံးပြုပြီး ပဲခူးမြို့ထဲကို ဝင်ရောက်ကြတာဖြစ်ပါတယ်။
အဲ့ဒီလို ကွေ့ပတ်သွားရတဲ့အတွက် ပဲခူး - ရန်ကုန်ကားခက ကျပ် ၁၀,၀၀၀ အထိ မြင့်တက်သွားသလို ပဲခူးဘူတာရုံမှာလည်း ရေတွေကြီးနေလို့ ရက်အကန့်အသတ်မရှိ ပိတ်ထားပါတယ်။
ပဲခူးမြို့ပေါ်မှာ ရေဘေးကြောင့် ဈေးတွေ၊ ဆိုင်တွေ၊ အိမ်တွေပိတ်ထားရပြီး ရေက တရိပ်ရိပ်တက်လာနေတဲ့အပြင် မိုးကလည်း အဆက်မပြတ်ရွာသွန်းနေပါတယ်။ ပဲခူးမြို့ကြီးက မိုးရေတွေကြားမှာ ရေတွေတက်နေပေမဲ့ ကူညီကယ်ဆယ်မယ့်သူတွေ နည်းပါးလို့ တိတ်ဆိတ်လို့ နေပါတယ်။
